«Baqytty otbasy» ıpotekalyq turǵyn úı baǵdarlamasy boıynsha ótinim qabyldaý bastaldy, dep habarlaıdy Egemen.kz Otbasy bank baspasóz qyzmetine silteme jasap.
«Baqytty otbasy» baǵdarlamasyna qatysý týraly ótinim otbasybank.kz platformasynda 20 maýsym men 19 shilde aralyǵynda qabyldanady. Ol úshin Otbasy bank klıenti bolý qajet jáne aýtentıfıkasııa kodyn alý úshin qolda uıaly telefon bolýy kerek. Qosymsha anyqtamalar men qujattar qajet emes. Júıe úmitkerdiń derekterin tekserip, ótinish qalyptastyrady.
Baǵdarlamaǵa qatysý úshin jergilikti organda turǵyn úı kezeginde turý qajet. О́tinim bere alatyn sanattar:
- kópbalaly otbasy;
- múmkindigi shekteýli bala tárbıelep otyrǵan otbasy;
- tolyq emes otbasy (neke buzylǵan sátten bastap keminde 3 jyl ótýi kerek).
Banktyń habarlaýynsha, ótken jyly «Baqytty otbasy» baǵdarlamasy boıynsha ótinim bergen, alaıda baspana almaǵan azamattar bıyl ótinimdi qaıta berýi qajet.
О́tinim qabyldaý aıaqtalǵannan keıin qatysýshylardyń negizgi jáne rezervtik tizimderi avtomatty túrde qalyptastyrylady. Tizimderge bólý kezinde qatysýshylardyń jergilikti ákimdikte kezekke turý kúni men sanaty eskeriledi. Konkýrs nátıjeleri otbasybank.kz portalyna ornastyrylady.
«2022 jyly «Baqytty otbasy» baǵdarlamasy boıynsha 5 myńnan astam otbasyǵa nesıe berýdi josparlap otyrmyz. Qazirdiń ózinde Otbasy bankke 51 mlrd teńge kóleminde qarajat tústi. Bıyl lımıtterdi baǵdarlamaǵa qatysýshylar arasynda bólý kezinde basymdyq ótken jyldaǵydaı, múmkindigi shekteýli balalardy tárbıelep otyrǵan otbasylarǵa beriledi», dep túsindirdi «Otbasy bank» AQ Basqarma Tóraıymy Lázzat Ibragımova.
Aıta ketsek, búginge deıin «Baqytty otbasy» baǵdarlamasymen 14 500 qazaqstandyq baspanaly.